ဖျားနေချိန် ဒါတွေ မလုပ်ပါနဲ့

ကိုယ်လက်တွေ ကိုက်ခဲနေတယ်။ အသက်ရှူလိုက်တိုင်း လေတွေက ပူနေသလိုပဲ။ ရေတွေလည်း ဆာတယ်။ အိပ်လည်း အရမ်းငိုက်နေတယ်လို့များ ခံစားနေရပြီလား ……. ဒါဆိုရင် သေချာပါတယ်။ သင်ဖျားနေတာပါ မိတ်ဆွေ။ ဖျားနေချိန် သတိထားရမယ့် အချက်လေးတွေ ရှိပါတယ်။

ဖျားနေတဲ့အခါ အတောင့်တဆုံး အရာက အမြန်ဆုံး ပြန်သက်သာဖို့ဟုတ်။ ဒါဆို ဖျားနေတာကို သက်သာစေဖို့ အဖျားရှိနေချိန်မှာ ရှောင်ရမယ့် အချက်လေးတွေကို ပြောပြပေးသွားပါမယ်။

ဖျားနေချိန် ဒါတွေ မလုပ်ပါနဲ့ 

ဖျားနာတယ်ဆိုတာက ခန္ဓာကိုယ်က အနားယူဖို့ လိုအပ်နေတဲ့ အချက်ပြမှု တစ်ခုဆို မမှားပါဘူး။ ဒီလို ဖျားနာနေတဲ့အခါ အမြန်ဆုံး သက်သာလာစေဖို့ဆိုရင်

ကဖင်း ပါတာတွေ ရှောင်ပါ

ဖျားနေချိန် မှာ ကော်ဖီ ပူပူလေး လက်ဖက်ရည် ပူပူလေး သောက်ချင်တယ်ဆိုတဲ့ ဆန္ဒမျိုး ဖြစ်နိုင်ပါတယ်။ ဒါပေမယ့် မသောက်ပါနဲ့။ ဒီလီု သောက်စရာတွေက ကဖင်းပါတာကြောင့် ကိုယ်တွင်း ရေဓာတ် ဆုံးရှုံးမှုကို ဖြစ်စေနိုင်ပြီး အဖျား ရှည်စေနိုင်ပါတယ်။

ဒါကြောင့် ဖျားနေချိန် မှာ လက်ဖက်ရည်၊ ကော်ဖီတွေ အပါအဝင် ကဖင်းဓာတ်ပါဝင်နေတဲ့ စားစရာ သောက်စရာတွေကို ရှောင်ဖို့ လိုပါမယ်။

အိပ်ရေး ပျက်မခံပါနဲ့

အချို့သော သာမန် ဖျားနာမှုတွေက အိပ်ရေးဝဝ အိပ်လိုက်ရုံနဲ့ သက်သာသွားတတ်ပါတယ်။ ဒါကြောင့် ဖျားနေချိန် မှာ မြန်မြန် သက်သာချင်တယ်ဆိုရင် အိပ်ရေးပျက်ခံပြီး ဖုန်းသုံးတာ၊ ဂိမ်းဆော့တာလိုမျိုး ပင်ပန်းတာမျိုးတွေ မလုပ်ပါနဲ့။

ပြည့်ပြည့်ဝဝ အိပ်စက် အနားယူလိုက်ဖို့ ပြောပါရစေ။

အဆီများတဲ့ နို့ထွက်ပစ္စည်းတွေ မစားပါနဲ့

ဖျားနေတဲ့အခါ နို့ထွက်ပစ္စည်းတွေ စားလိုက်တာက အာဟာရပြည့်ပြီး ကျန်းမာစေဖို့ ထောက်ကူပေးနိုင်မယ်လို့ ယူဆကောင်း ယူဆနိုင်ပေမယ့် တကယ်ကတော့ ဖျားနေချိန်မှာ နို့ထွက်ပစ္စည်းတွေကို မစားသင့်ပါဘူး။

အစာခြေစနစ်က ဖျားနေချိန်မှာ ကောင်းကောင်း အလုပ်မလုပ်နိုင်တာကြောင့် နို့ နဲ့ နို့ထွက် ပစ္စည်းတွေကို ချေဖျက်ဖို့ ခက်ခဲပြီး ခန္ဓာကိုယ်ကို ဝန်ပိစေနိုင်တာကြောင့်ပါ။

ဒါကြောင့် ဖျားနေချိန်မှာ အမြန်ဆုံး သက်သာဖို့ဆိုရင် အဆီများတဲ့ နို့၊ ဒိန်ချဉ် စတာတွေ အပါအဝင် နို့ထွက်ပစ္စည်းတွေကို မစားပါနဲ့။

ဆေးလိပ် မသောက်ပါနဲ့

ဆေးလိပ်က ကျန်းမာရေးအတွက် မကောင်းဘူးဆိုတာ သိပြီးသားဖြစ်မှာပါ။ ပုံမှန် ကျန်းမာနေချိန်မှာတောင် ဆေးလိပ်မသောက်သင့်ဘူးဆိုရင် ကိုယ်ခံအား အားနည်းတာကြောင့် ဖျားနေချိန်မှာ ပိုလို့တောင် ဆေးလိပ် မသောက်သင့်ပါဘူး။

ဖျားနေချိန်မှာ ဆေးလိပ်သောက်တာက အဖျားတာရှည်စေနိုင်လို့ပါ။

မျက်နှာကို လက်နဲ့ ကိုင်တွယ် ထိတွေ့တာမျိုး မလုပ်ပါနဲ့

ဖျားနာနေချိန်မှာ လက်မဆေးဘဲ မျက်နှာ အစိတ်အပိုင်းတွေ ဖြစ်တဲ့ မျက်လုံး၊ နှာခေါင်း၊ ပါးစပ်တို့ကို ထိတွေ့တာက မလိုအပ်ဘဲ ရောဂါတွေ ကူးစက်ခံရနိုင်ပါတယ်။ ဒါကြောင့် ဖျားနေချိန်မှာ ပြင်ပက ကူးစက်ရောဂါတွေ မဝင်စေဖို့ရော အဖျား မြန်မြန်သက်သာဖို့ပါ။ မျက်နှာကို လက်နဲ့ ကိုင်တွယ် ထိတွေ့တာမျိုး မလုပ်ပါနဲ့။

ဆေးမသောက်ဘဲ မနေပါနဲ့

ဖျားနေချိန်မှာ ကိုယ်ခံအားက ရောဂါပိုးတွေကို တိုက်ထုတ်နေတယ်ဆိုပေမယ့် ကိုယ်ခံအားက အကူအညီ လိုအပ်တဲ့ အချိန်ရှိနိုင်ပါတယ်။ ဒီလို အကူအညီ လိုအပ်ချိန်မှာ တပ်ကူ ဖြည့်တဲ့ အနေနဲ့ ဆေးစာမပါဘဲ ဝယ်ယူလို့ရတဲ့ အဖျား သက်သာစေတဲ့ ဆေးတွေ သောက်ဖို့ လိုပါမယ်။

ဒီလို ဖျားနာနေချိန်မှာ ဆေးမသောက်ဘဲ ကိုယ်ခံအားက သူ့အလုပ် သူလုပ်လိမ့်မယ်ဆိုပြီး လွှတ်ထားတာ ကျန်းမာရေးကို မလိုအပ်ဘဲ ထိခိုက်စေနိုင်ပါတယ်။

လေ့ကျင့်ခန်း မလုပ်ပါနဲ့

လေ့ကျင့်ခန်း လုပ်တာက ခန္ဓာကိုယ်ကို ကျန်းမာကြံ့ခိုင်စေတယ်ဆိုပေမယ့် ဖျားနေချိန်မှာတော့ လေ့ကျင့်ခန်း လုပ်တာက ခန္ဓာကိုယ်ကို ပင်ပန်းစေပြီး အဖျားတာရှည်စေနိုင်ပါတယ်။ ဒါကြောင့် ဖျားနေချိန်မှာ အင်အားပြည့်ဝပြီး မြန်မြန် သက်သာစေဖို့ဆိုရင် လေ့ကျင့်ခန်း မလုပ်ပါနဲ့။