ရောဂါ ကာကွယ်ဖို့ တပ်ကြတဲ့ ပါးစပ်နှင့်နှာခေါင်းစည်း(mask)ကလေးတွေကို ဖန်စီကျကျ အလှဆင်ကြမယ်။

ကိုဗစ်ကာလမှာ အပြင်သွားရင် မဖြစ်မနေ ယူသွားဖို့ လိုတဲ့အရာလေး တစ်ခု တိုးလာခဲ့ပါတယ်။ ဒါကတော့ ပါးစပ်နှင့်နှာခေါင်းစည်း(mask)လေးပါ။

အရင်က အပြင်သွားမယ်ဆိုရင် ထီးပါပြီလား၊ ဖုန်း၊ ပိုက်ဆံအိတ် စသဖြင့်ပဲ စစ်ကြပေမယ့် အခုဆိုရင် ပါးစပ်နှင့်နှာခေါင်းစည်း(mask)ပါရဲ့လား စစ်ရပါတယ်။ နောက်တစ်ခုကတော့ ရေမလိုလက်သန့်ဆေးရည် ဒါမှမဟုတ် ပိုးသတ်တစ်သျှူးပါ။

ကိုဗစ် စတင်ဝင်ရောက်စဉ်က ပါးစပ်နှင့်နှာခေါင်းစည်း(mask)ယူတာကို အကျင့်မရပေမယ့် အခုဆိုရင် ကိုဗစ်ကို ရင်ဆိုင်လာရတာ ဒုတိယလှိုင်းတောင်ဖြစ်ပြီး တစ်နှစ်ပြည့်ခါနီးလာပြီဆိုတော့ အပြင်သွားရင် ပါးစပ်နှင့်နှာခေါင်းစည်း(mask)တပ်တာ၊ မတ်ခ် အပိုဆောင်သွားတာက လုပ်နေကျ အလေ့အထလေးလိုတောင် ဖြစ်လာပါပြီ။

ဒါပေမယ့် နေ့တိုင်း မတ်ခ်တပ်တဲ့အခါ အရောင်ပြောင်းတပ်တယ်ဆိုပေမယ့် ဖက်ရှင်ကျကျ လှလှပပတပ်ချင်သူတွေအတွက် ပါးစပ်နှင့်နှာခေါင်းစည်း(mask)လေးတွေကို ကျန်းမာရေးနဲ့လည်း ညီညွတ်ပြီး ဖန်စီကျကျ လှလှပပလေးဖြစ်အောင် ဘယ်လို ဖန်တီးရမလဲဆိုတာကို ဒီဆောင်းပါးလေးကနေ ပြောပြပေးသွားပါမယ်။

ပါးစပ်နှင့်နှာခေါင်းစည်း(mask)လှလှလေး ကိုယ်တိုင် ဖန်တီးကြမယ်

ပါးစပ်နှင့်နှာခေါင်းစည်း(mask)ကလေးကို ကိုယ်တိုင် ဖန်တီးတော့မယ်ဆိုရင် အရင်ဆုံး မှာချင်တာက လှပဖို့ဆိုပေမယ့် ဘေးကင်းဖို့ကို အဓိက ဂရုစိုက်ဖို့ပါ။ ဘေးကင်းဖို့ဆိုတဲ့ နေရာမှာ ရောဂါပိုးတွေ ဝင်ရောက်ကူးစက်နိုင်တဲ့ နှာခေါင်း၊ ပါးစပ် စတဲ့နေရာတွေကို ပိတ်ဆို့နေတာမျိုး မဟုတ်ဘဲ အထိရောက်ဆုံး ကာကွယ်ပေးနိုင်တာမျိုး ဖြစ်ဖို့ပါ။

နောက်တစ်ချက်ကတော့ အသားအရေကို ထိခိုက်စေတာမျိုး မရှိတဲ့ သဘာဝ ချည်သား၊ သဘာဝပစ္စည်းတွေကိုပဲ အသုံးပြုဖို့ပါ။ ချည်သားကို အသုံးပြုပြီး ပါးစပ်နှင့်နှာခေါင်းစည်း(mask) ချုပ်တဲ့အခါ တစ်ထပ်တည်းဆို မလုံလောက်ပါဘူး။ အနည်းဆုံး ၃ ထပ်လောက် အထပ်ထပ် ချုပ်ဖို့ လိုပါမယ်။

အလှဆင်လို့ လှဖို့ဆိုရင် ပိတ်စက ဗြောင်ဖြစ်နေဖို့ လိုပါမယ်။ အ​ဖြူဆိုလည်း အဖြူဗြောင်၊ အနက်ဆိုလည်း တစ်ရောင်တည်း၊ အပြာ၊ ပန်းရောင်၊ ခရမ်း စသဖြင့်ပေါ့။ ချည်သား စစ်စစ်ဖြစ်ဖို့ကိုလည်း မမေ့ပါနဲ့။

နောက်ထပ် အလှဆင်နိုင်မှာ တစ်ခုက အရင်ကာလတွေကတည်း သုံးခဲ့ကြတဲ့ အဝတ်တွေကို အရောင်တင်တဲ့ သဘာဝဆိုးဆေးကို အသုံးပြုတာပါ။ ခရမ်းရောင် ဂေါ်ဖီ၊ ကြက်သွန်နီခွံ၊ နနွင်းစတာတွေကို အသုံးပြုပြီး နှာခေါင်းစည်းကို အလှဆင်လို့ ရပါတယ်။