ရှိန်းခို ဆေးဖက်ဝင်သလား ......

ရှိန်းခို ပုံမှန် ဟင်းတွေချက်တဲ့အခါ သုံးလေ့မရှိပေမယ့် ဆေးဖက်ဝင် အရာတစ်ခုအနေနဲ့တော့ အသုံးပြုကြပါတယ်။ အိန္ဒိယ ဟင်းလျာတွေထဲမှာတော့ ထည့်ချက်လေ့ ရှိပါတယ်။ ရှိန်းခိုက ဆေးဖက်ဝင်တယ်ဆိုတာကို သိပေမယ့် ဘယ်လိုဆေးဖက်ဝင်လဲဆိုတာကို မသိဘူးဆိုတဲ့သူတွေအနေနဲ့ ဒီဆောင်းပါးလေးကို ဖတ်ကြည့်လို့ ရပါတယ်။

ရှိန်းခိုဆိုတာ

အပင်ငယ်မျိုးဖြစ်ပြီး အကိုင်းအခက်များ အောက်ခြေမှ ပင်စုပြုံ၍ ထွက်တတ်ကြပါတယ်။ အပင်ငယ် တစ်မျိုးပါ။ အရွက်တွေက မာလကာရွက်နဲ့ ခပ်ဆင်ဆင် တူပါတယ်။ မျက်နှာပြင်က ပြောင်ချောပြီး ရွက်ကြောများ ရှိပါတယ်။ အပွင့်လေးတွေက အဝါရောင်ပါ။

ဟင်းထဲကို ထည့်ချက်လေ့ရှိတဲ့ ရှိန်းခိုက အပင်လိုက်ထည့်တာမျိုး မဟုတ်ဘဲ အမှုန့်လေးတွေ၊ အခဲလေးတွေ လုပ်ထားတာမျိုးကို ထည့်ကြတာပါ။

ရှိန်းခို ဆေးဖက်ဝင်သလား ……

ရှိန်းခိုက ဆေးဖက်ဝင်ပါတယ်။ ဘယ်လို ဆေးဖက်ဝင်တာလဲဆိုတော့ အတူတူ ဆက်ကြည့်လိုက်ရအောင်လား ……

အစာကြေစေတယ်

ရှိန်းခိုမှာ အမျှင်ဓာတ်ပါဝင်နေတာကြောင့် အစာခြေစနစ်ကို ကျန်းမာစေပြီး အူတွေရဲ့ လှုပ်ရှားမှုကို ကောင်းစေသလို ဝမ်းမှန်စေပါတယ်။ အစာခြေအက်ဆစ် ထွက်ရှိမှုကို တိုးမြှင့်ပေးနိုင်သလို သည်းခြေရည် ထွက်ရှိမှု ကောင်းစေပြီး အသည်းရဲ့ လုပ်ဆောင်မှုတွေကိုလည်း ကောင်းစေနိုင်ပါတယ်။

ကာဗိုဟိုက်ဒရိတ်၊ ပရိုတင်းနဲ့ အဆီတွေကို ချေဖျက်မှု ကောင်းစေဖို့ ကူညီပေးပါတယ်။ အစားစားချင်စိတ်ကို တိုးစေနိုင်ပြီး အစာမကြေတာမျိုး မဖြစ်စေဖို့ ကာကွယ်ပေးပါတယ်။ ဗိုက်ကယ်တာ၊ လေပွတာ၊ ဗိုက်နာဗိုက်အောင့်တွေ မဖြစ်စေဖို့ ကာကွယ်ပေးပါတယ်။

အသက်ရှူလမ်းကြောင်း ကျန်းမာစေနိုင်တယ်

ရှိန်းခိုက အသက်ရှူလမ်းကြောင်းထဲက ချွဲကလိပ်တွေကို ဖယ်ရှားပေးပြီး ရင်ကြပ်တာ၊ ချောင်းဆိုးတာ၊ နှာခေါင်းပိတ်တာ၊ ချွဲကြပ်တာတွေကို သက်သာစေနိုင်ပါတယ်။ လေပြွန် အတွင်းဘက် ရောင်ရမ်းတာတွေကို သက်သာစေပြီး လေပြွန်ရောင်တာ၊ ပန်းနာရင်ကြပ် စတာတွေကို သက်သာစေနိုင်ပါတယ်။

ခေါင်းကိုက်တာကို သက်သာစေတယ်

သွေးတွင်း ကိုလက်စထရော ကျဆင်းစေတယ်

ရှိန်းခိုက ခန္ဓာကိုယ်ရဲ့ ဇီဝကမ္မဖြစ်စဉ်ကို ကောင်းမွန်စေပြီး သွေးတွင်းကိုလက်စထရောကို ကျဆင်းစေနိုင်ပါတယ်။ သွေးကြောတွေ ရောင်တာကို သက်သာစေပြီး သွေးကြောထဲမှာ အနယ်တွေဖြစ်တာ သွေးကြောကျဉ်းတာတွေကို သက်သာစေနိုင်ပါတယ်။

သွေးပေါင်ထိန်းညှိပေးတယ်

ရှိန်းခိုမှာ ပိုတက်ဆီယမ် ပါဝင်နေတာကြောင့် ကိုယ်တွင်းက ဆိုဒီယမ် ပမာဏကို ထိန်းညှိပေးပါတယ်။ သွေးပေါင်ချိန်ကို ထိန်းညှိပေးပြီး သွေးကြောတွေကို ပြေလျော့စေနိုင်ပါတယ်။ သွေးစီးဆင်းမှု ကောင်းစေနိုင်တာကြောင့် ခန္ဓာကိုယ်ရဲက နေရာအနှံ့ကို သွေးစီးဆင်းရောက်ရှိမှု ကောင်းစေပါတယ်။

သွေးကြောအတွင်းနံရံတွေအပေါ် ဖိအား သက်ရောက်မှုကို လျှော့ချပေးပြီး သွေးလွှတ်ကြောတွေ သွေးပြန်ကြောတွေကို ထိခိုက်မှု မဖြစ်စေဖို့ ကာကွယ်ပေးပါတယ်။

ရှိန်းခိုက သွေးကြောထဲမှာ သွေးမခဲစေဖို့လည်း ကာကွယ်ပေးပါတယ်။ သွေးပေါင်ကို ထိန်းညှိပေးပြီး နှလုံး ကျန်းမာစေဖို့လည်း ထောက်ကူပေးပါတယ်။

ပိုးကောင် ကိုက်တာကို သက်သာစေနိုင်ပါတယ်

ရှိန်းခိုမှာ ဘက်တီးရီးယားတွေကို တိုက်ဖျက်ပေးနိုင်ပြီး အရောင်ကျစေနိုင်တဲ့ အာနိသင်ရှိတာကြောင့် အရေပြားမှာ အင်းဆက်တွေ ကိုက်ပြီး ရောင်ရမ်းနာကျင်တာကို သက်သာစေနိုင်ပါတယ်။

အရေပြား ကျန်းမာစေတယ်

ရှိန်းခိုရဲ့ နောက်ထပ် အာနိသင်တစ်ရပ်က အရေပြားကို ကျန်းမာစေပြီး ဝက်ခြံ ကင်းစေသလို အသားအရေကို ကြည်လင် လှပစေမှာပါ။ အရေပြားပေါ်မှာ သနပ်ခါး၊ rose water တို့နဲ့ တွဲပြီး အသုံးပြုပေးလို့ ရပါတယ်။

အနံ့ဆိုးပေမယ့် ရှိန်းခိုက ကျန်းမာရေးကို အခုလို ထောက်ကူပေးပါတယ်။