စိတ်ကျဝေဒနာ အကြိမ်ကြိမ် ပြန်ဖြစ်ရခြင်း အကြောင်း

လူတွေဟာ စိတ်ဓာတ်ခဏခဏကျနိုင်ပေမယ့် စိတ်ကျရောဂါကတော့ တစ်သက်မှာ တစ်ကြိမ်သာဖြစ်တတ်ကြတာများပါတယ်။ ဒါပေမယ့် တချို့လူတွေမှာတော့ အခြေအနေက အဲ့လိုမရိုးရှင်းတတ်ပါဘူး။

တစ်ကြိမ်ကုသပြီးချိန်မှာတောင်မှ နောက်ထပ်တစ်ကြိမ် စိတ်ကျဝေဒနာပြန်ခံစားရတာမျိုးဖြစ်လာနိုင်ပါတယ်။ များသောအားဖြင့် ဒီဝေဒနာကို ဆေးဝါး၊ စိတ်ပိုင်းဆိုင် ဒါမှမဟုတ် လျှပ်စစ်ရှော့ခ်ရိုက်ပြီး လိုက်ကြတာများပါတယ်။

ဆေးဝါးနဲ့ကုသတဲ့နည်းလမ်းကတော့ အသုံးများပြီးတော့ ဘေးထွက်ဆိုးကျိုးလည်းရှိပါတယ်။ အဖြစ်များတဲ့ ဘေးထွက်ဆိုးကျိုးတွေကတော့

• ကိုယ်အလေးချိန်တက်တာ၊
• လိင်ဆက်ဆံရာတွင် အဆင်မပြေဖြစ်တာနဲ့
• ပျို့အန်တာတွေပါပဲ။

ဒီလိုစနစ်တကျကုသမှုတွေ ခံယူပြီး ပျောက်ကင်းသွားချိန်မှာ ရောဂါလက္ခဏာတွေပြန်ပြပြီး စိတ်ကျဝေဒနာ ထပ်ပြီးခံစားရတာမျိုးဖြစ်လာနိုင်ပါတယ်။ ပျောက်ကင်းပြီးမှ ထပ်ကျော့စိတ်ဓာတ်ကျတာမျိုးပေါ့။

ဘာလို့ စိတ်ကျဝေဒနာ ပြန်ဖြစ်တာလဲ

ဒီလိုဖြစ်လာစေတဲ့အကြောင်းအရင်းအမျိုးမျိုးရှိပါတယ်။ အလွန်စိတ်ဖိစီးစရာ စိတ်ပင်ပန်းစရာ အဖြစ်အပျက်မျိုးကို ပြင်းထန်စွာကြုံတွေ့လိုက်ရချိန်တွေမှာ ခုလိုထပ်ဖြစ်နိုင်ပါတယ်။

ဒါ့အပြင်

• ချစ်သူခင်သူတစ်ဦးဦးကို ဆုံးရှုံးလိုက်ရတာ
• နာကျင်ဖွယ်၊ စိတ်ညစ်ညူးဖွယ် ဘဝအတွေ့အကြုံမျိုး၊ အမှားအယွင်းမျိုး ကျူးလွန်မိခဲ့တာ
• ပြင်းထန်တဲ့ စိတ်ဖိစီးမှုဝေဒနာ ခံစားရတာ
• မိသားစုအတွင်း သိသာထင်ရှားတဲ့အပြောင်းအလဲတွေကို ရင်ဆိုင်လိုက်ရတာ
• ဟော်မုန်းပြောင်းလဲတာ
• ကိုယ်ဝန်ရတာ
• သွေးဆုံးတာ
• အပျိုဖော်ဝင်တာ စတာတွေကြောင့်ပါပဲ။

ထပ်ကျော့စိတ်ကျဝေဒနာရဲ့ လက္ခဏာများ

ထပ်ကျော့စိတ်ကျဝေဒနာခံစားလာရရင် ပုံမှန်စိတ်ကျဝေဒနာတွေလိုပဲ ရောဂါလက္ခဏာတွေပြသတတ်ပါတယ်။ အောက်ပါလက္ခဏာတွေဟာ စိတ်ကျဝေဒနာ ထပ်မံဖြစ်ပွားသူတွေမှာ ပြသတတ်တဲ့ လက္ခဏာတွေဖြစ်ကြပါတယ်။

• မျှော်လင့်ချက်ကင်းမဲ့တယ်လို့ ခံစားရလာတာ
• အထီးကျန်လာတာ၊ လူတွေကို ရှောင်ဖယ်လာတာ
• အိပ်စက်ပုံပြောင်းလဲပြိး အိပ်မပျော်ဖြစ်လာတာ
• စိတ်အနှောင့်အယှက်ဖြစ်လွယ်၊ စိတ်တိုလွယ်လာတာ
• လိင်စိတ်ကုန်ခမ်းလာတာ
• လူမှုအသိုင်းအဝိုင်းအကြားမှာ မပျော်တော့တာ
• တန်ဖိုးမရှိသလို ခံစားလာရတာ
• နာတာရှည် နာကျင် ကိုက်ခဲနေတတ်တာ
• ကိုယ်အလေးချိန် ရုတ်တရက် တက်လာတာ သို့မဟုတ် ကျသွားတာ
• မေပန်းနွမ်းနယ်နေတာ
• ဆင်ခြင်တွေးတောနိုင်စွမ်း အားနည်းလာတာ
• သတ်သေဖို့ မကြာခဏ စိတ်ကူးပေါ်လာတတ်တာတွေပါပဲ။

ဘယ်လိုရှောင်ရှားကြမလဲ

စိတ်ကျဝေဒနာ ထပ်ပြီး မဖြစ်ပေါ်စေဖို့ဆိုရင် အကောင်းဆုံးနည်းလမ်းက ကာကွယ်ခြင်းဖြစ်ပါတယ်။ ကာကွယ်ခြင်းဟာ ကုသခြင်းထက်ပိုပြီး ကောင်းမွန်တဲ့နည်းလမ်းလို့ ဆိုလို့ရပါတယ်။

အောက်ပါနည်းလမ်းတွေနဲ့ ဒီဝေဒနာကို ကာကွယ်နိုင်ပါတယ်။

• • လေ့ကျင့်ခန်းလုပ်ပါ၊
  • တက်ကြွရွှင်လန်းအောင်နေပါ၊
  • တီဗီ၊ ရုပ်ရှင်စတဲ့ ဖျော်ဖြေရေးအစီအစဉ်တွေကြည့်တာ၊
  • အားကစားပွဲတွေကြည့်ပါ၊
  • ရည်မှန်းချက်ပန်းတိုင်သတ်မှတ်ပြီး တကယ်ဖြစ်မြောက်လာအောင် အာရုံစိုက်ကြိုးပမ်းပါ၊
  • စိတ်ဖိစီးမှုကင်းစင်စေမယ့် အစုအဖွဲ့လိုက်လှုပ်ရှားမှုမျိုးတွေ ပြုလုပ်ပါ၊
  • မိတ်ဆွေအပေါင်းအသင်းတွေနဲ့ ရင်းရင်းနှီးနှီးဆက်ဆံပေါင်းသင်းပါ၊
  • မိသားစုကို အချိန်ပေးပြီး သူတို့နဲ့ ပျော်ရွှင်စရာအချိန်တွေ ဖန်တီးပါ၊
  • တရားထိုင်ပါ၊ အသက်ရှူလေ့ကျင့်ခန်းလုပ်ပါ၊
  • အာဟာရပြည့်ဝအောင်စားပါ၊
  • အိပ်စက်ချိန်မှန်အောင် သတိထားပြီး အိပ်စက်ပါ။