ဆိတ်ငြိမ်မှုကို ကြောက်ရွံ့ခြင်း (သို့မဟုတ်) Sedatephobia

ဆိတ်ငြိမ်မှု က သင့်ကို စိတ်ကသိကအောင့် ဖြစ်စေသလား။ တိတ်ဆိတ်နေတာက အထီးကျန်သလိုလို၊ စိတ်ထဲခြောက်ခြားသလိုဖြစ်နေပါသလား။ ဒါကို ကိုယ်တစ်ယောက်တည်း ခံစားနေရတာလား။ ဒါမှမဟုတ် အခြားသူတွေရော ခံစားရတာသလားဆိုပြီးတွေးနေလား။ ဒါဆိုရင်တော့ ဒီဆောင်းပါးလေးကို ဖတ်ကြည့်လို့ လိုပါမယ်။

တိတ်ဆိတ်မှုက လူကိုခြောက်ချားစေသလား။

လူတော်တော်များများက တိတ်ဆိတ်တာကို မကြောက်ကြဘူးလို့ ယူဆကြပါတယ်။ တကယ်ကတော့ လူတိုင်း တိတ်ဆိတ်မှုကို မကြောက်တာ မဟုတ်ပါဘူး။ တိတ်ဆိတ်မှုက သူတို့အတွက် ချောက်ချားမှုဖြစ်စေတာကြောင့် ဆိတ်ငြိမ်မှုကို ကြောက်ရွံ့တဲ့သူတွေ ရှိပါတယ်။

ဒီလို တိတ်ဆိတ်မှုကို ကြောက်တာက စိတ်ကျန်းမာရေးပြဿနာတစ်ရပ်ပါ။ လွန်ခဲ့တဲ့ နှစ်ပေါင်း ၅၀ လောက်က ဒီစိတ်ကျန်းမာရေးပြဿနာကို ဘယ်သူတစ်ဦးတစ်ယောက်ကမှ အမည် မဖော်နိုင်ခဲ့ကြပါဘူး။ ဒီနေ့ခေတ်မှာတော့ တိတ်ဆိတ်မှုကို ကြောက်တဲ့ စိတ်ရောဂါကို Sedatephobic လို့ခေါ်ဆို သတ်မှတ်နိုင်ခဲ့ကြပါပြီ။

လူတွေက သူတို့ရဲ့နေ့စဉ်ဘဝတွေကို ကားသံ၊ လူသံ၊ ကျေးငှက်တွေ၊ တိရစ္ဆာန်တွေရဲ့အသံတွေ၊ စက်ကိရိယာတွေရဲ့ အသံတွေနဲ့ ကုန်ဆုံးမှန်း မသိ ကုန်ဆုံးနေကြပါတယ်။ ဒီနေ့ခေတ်မှာဆိုရင် တိတ်ဆိတ်မှုက အဆန်းတကြယ်လိုတောင် ဖြစ်လာကြပါတယ်။ ကားမောင်းရင်း၊ ကားစီးရင်း ရုံးတွေ အလုပ်ခွင်တွေကို သွားကြတဲ့အခါ ဖုန်းတွေနဲ့ သီချင်းနားထောင်တာ၊ ရေဒီယိုကလာတဲ့ သီချင်းတွေ အစီအစဉ်တွေကို နားထောင်ရင်း သွားကြသလို အလုပ်ခွင်ရောက်တဲ့အခါမှာလည်း လုပ်ငန်းခွင်က အသံအမျိုးမျိုးက နားမစိုက်ထောင်ဘဲတောင် နားထဲရောက်လာပါတယ်။

ညနေ အလုပ်ပြန်ချိန်မှာလည်း ဖုန်းနဲ့ သီချင်းနားထောင်ရင်း အိမ်ပြန်ရောက် အိမ်အလုပ်တွေ လုပ်ရင်း TV ဖွင့် နားထောင်နေတာမျိုးတွေကြောင့် လုံးဝ တိတ်ဆိတ်တဲ့ အခြေအနေဆိုတာ ခပ်ရှားရှားလို ဖြစ်လာပါတယ်။

ဒါကြောင့် ကိုယ်တိုင်က တိတ်ဆိတ်မှုကို ကြောက်တတ်တဲ့ စိတ်ရောဂါ ရှိလားဆိုတာကို သိရှိသူက ခပ်ရှားရှားပါ။ နေ့စဉ် ထိတွေ့နေကျ ကြားနေကျ အသံတွေ အားလုံးတိတ်ဆိတ်ပြီး နာရီပိုင်းလောက်နေကြည့်ချိန်မှာ စိတ်ထဲ ကြောက်သလိုလို ဖြစ်လာမယ်ဆိုရင်တော့ ဆိတ်ငြိမ်မှုကို ကြောက်ရွံ့ခြင်း (Sedatephobia) ကို ခံစားနေရတာပါ။

ဒီစိတ်ကျန်းမာရေး ပြဿနာကို ခံစားနေရသူတွေဟာ အမြဲလိုလို ဆူညံသံတွေ၊ လူအချင်းချင်း ပြောဆိုမှုတွေကို လိုအပ်နေပြီး တိတ်ဆိတ်သွားမှုက သူတို့ကို အတော်လေး ချောက်ချား ထိတ်လန့်စေပါတယ်။ စိတ်ဖိစီးမှုတွေ စိုးရိမ်စိတ်တွေ များစေပါတယ်။ ဒီစိတ်ကျန်းမာရေး ပြဿနာရှိသူတွေက အမှောင်ကိုလည်း ကြောက်တတ်ကြပါသေးတယ်။ ဒီလို အမြဲတစေ ဆူညံမှုတွေကို လိုအပ်နေခြင်းက အရမ်းကို အန္တရယ်များတဲ့ အခြေအနေပါ။

အကြောင်းကတော့ လူတွေရဲ့ စိတ်ဖိစီးမှုတွေနဲ့ တင်းအားတွေကို ပြေလျော့စေဖို့ တိတ်ဆိတ်ငြိမ်သက်စွာ နေထိုင်ရတဲ့ အခိုက်အတန့်လေးတွေက မဖြစ်မနေ လိုအပ်တာကြောင့်ပါ။

ဆိတ်ငြိမ်မှုကို ကြောက်ရွံ့ခြင်း (သို့မဟုတ်) Sedatephobia ကို ဖြစ်စေတဲ့ အကြောင်းအရင်းတွေက ဘာတွေများလဲ။

ကြောက်ရွံ့မှုတိုင်းလိုလိုမှာ ထိတ်လန့်တုန်လှုပ်စရာ ကောင်းတဲ့ အဖြစ်အပျက်တွေ၊ အပျက်သဘောဆောင်တဲ့ ဘဝအတွေ့အကြုံတွေ ရှိပါတယ်။ ဒီလိုပါပဲ ဆိတ်ငြိမ်မှုကို ကြောက်ရွံ့ခြင်း (သို့မဟုတ်) Sedatephobia ကိုဖြစ်စေတဲ့ အကြောင်းရင်းခံတွေ ရှိပါတယ်။

အခန်းတွေထဲမှာ အလုံပိတ် ခံခဲ့ရဖူးတာ၊ မြေအောက်ခန်းလိုနေရာမျိုး၊ အလင်းရောင်ရော အသံပါ မဝင်နိုင်တဲ့ နေရာမျိုးမှာ ပိတ်လှောင် အပြစ်ပေးခံရတာ၊ လူကြီးတစ်ဦးဦးရဲ့ နှိပ်စက်ညှင်းပန်း ခံရဖူးသူတွေက ဆိတ်ငြိမ်မှုကို ကြောက်ရွံ့ကြပါတယ်။ ကလေးဘဝမှာ ဒီအဖြစ်အပျက်တွေ ကြုံတွေ့ခဲ့ရသူတွေက ဆိတ်ငြိမ်မှုကို Sedatephobia ကို ခံစားရနိုင်ပါတယ်။

ဒီ စိတ်ကျန်းမာရေး ပြဿနာကို ခံစားနေရသူတွေက တိတ်ဆိတ်တဲ့ အခန်းတွေ၊ နေရာတွေမှာ မိနစ် နည်းနည်းလောက် နေထိုင်ဖို့ ခက်ခဲသလို တရားထိုင်ဖို့လည်း မဖြစ်နိုင်ပါဘူး။ သူတို့ဟာ အမြဲလိုလို ဖုန်း၊ TV စတာတွေကို လိုအပ်နေတတ်ကြပါတယ်။

အချို့ ဆိတ်ငြိမ်မှုကို ကြောက်ရွံ့ခြင်း (သို့မဟုတ်) Sedatephobia အရမ်းမပြင်းထန်ဘဲ ခံစားနေရတာမျိုးတွေ ရှိပါတယ်။ ဒီလို အခြေအနေကတော့ ကလေးဘဝမှာ အသံထွက်ရင် ရိုက်မှာနော်။ အပြစ်ပေးခံရမယ်ဆိုပြီး လူကြီးတွေရဲ့ ပြောဆိုမှုတွေကို ခံခဲ့ရတာ၊ အပြစ်ပေးမှုတွေကို ခံခဲ့ရတာကြောင့် ဖြစ်ပါတယ်။

ပြင်းထန်စူးရှတဲ့ ဆူညံသံတွေက ခေါင်းကိုက်စေပါတယ်။ ဒါပေမယ့် တိတ်ဆိတ်မှုကို ကြောက်ရွံ့သူတွေအတွက်ကတော့ ဆိတ်ငြိမ်မှုက စိတ်ဖိစီး စိုးထိတ်စေပြီး ခေါင်းကိုက်တာ၊ ပြင်းပြင်းထန်ထန် ကြောက်ရွံ့တာတွေကို ဖြစ်စေနိုင်ပါတယ်။

ဆိတ်ငြိမ်မှုကို ကြောက်ရွံ့ခြင်း (သို့မဟုတ်) Sedatephobia ခံစားရသူတွေမှာ လက္ခဏာ အနေနဲ့

• ကတုန်ကယင်ဖြစ်တာ
• ထိတ်ထိတ်ပြာပြာ ဖြစ်တာ
• ခံတွင်းခြောက်တာ
• ခြေဖဝါး လက်ဖဝါးတွေမှာ ချွေးစေးပြန်တာ
• စကားပြောဖို့ ခက်တာ
• ခံစားချက်ကို ဖော်ပြဖို့ ခက်တာ
• သည်းသည်းထန်ထန် ငိုတာ
• ထိတ်လန့်ပြီး ခြေဦးတည့်ရာ ထွက်ပြေးတာ
• မှင်သေတာ
• နှလုံးခုန် မြန်တာ
• မအီမသာဖြစ်တာ
• ဗိုက်ထဲက အောင့်သလိုလို ခံစားရတာမျိုးတွေ ခံစားရနိုင်ပါတယ်။

ဒီ စိတ်ကျန်းမာရေး ပြဿနာကို ခံစားနေရသူတွေက အုပ်စုလိုက် စကားပြောနေချိန် ရုတ်တရက် ငြိမ်ကျသွားတာကို ကြောက်တာမျိုး ရှိသလို စာကြည့်တိုက်ထဲမှာ တိတ်ဆိတ်နေတာကို ကြောက်တာ၊ တစ်ယောက်တည်း အိပ်ဖို့ လှဲနေချိန်မှာ ကြောက်တာမျိုး အမျိုးမျိုး ရှိကြပါတယ်။

ဆိတ်ငြိမ်မှုကို ကြောက်ရွံ့ခြင်း (သို့မဟုတ်) Sedatephobia ကို ဘယ်လို ကုသမလဲ။

ဆိတ်ငြိမ်မှုကို ကြောက်ရွံ့ခြင်း (သို့မဟုတ်) Sedatephobiaက စိတ်ကျန်းမာရေး ပြဿနာ တစ်ရပ်ဖြစ်တာ​ကြောင့် ကုသလို့ ရပါတယ်။ စိုးရိမ်မှုကို အရင်းနှါ်ဆုံးသူကို ပွင့်ပွင့်လင်းလင်းပြောပြပြီး သက်သာစေမယ့် နည်းလမ်းတွေကို ရှာတာမျိုးကနေစလို့ စိတ်ပညာကုထုံး ပညာရှင်တွေနဲ့ ကုသတာမျိုး အထိပေါ့။

• CBT (or cognitive behavior therapy) ကုထုံး
• NLP ဒါမှမဟုတ် neurolingusitic programming ကုထုံး
• systematic desensitization ကုထုံးတွေနဲ့ ဆိတ်ငြိမ်မှုကြောင့် ခံစားရတဲ့ စိုးရိမ်စိတ်တွေကို ဖြေလျော့ပြီး ကုသမှု ခံယူလို့ ရပါတယ်။ ဒီကုထုံးတွေကပဲ Sedatephobia ကို အကောင်းဆုံး ကျော်ဖြတ်နိုင်အောင် ကူညီပေးမှာပါ။