ကိုယ့်အိမ်မှာ ဆရာဝန်တစ်ယောက်လောက် မခေါ်ထားချင်ဘူးလား

နေအိမ်တိုင်းမှာအရေးပေါ်ဆေးသေတ္တာထားသင့်ပါတယ်။ မတော်တဆမှုဆိုတာမျိုးက ကြိုမှန်းထားလို့မှမရတာလေနော်။ ချက်ရင်းပြုတ်ရင်းဓါးရှမလား၊ အပူလောင်မလား၊ သွားရင်းလာရင်း ခလုတ်တိုက်မလား၊ချော်လဲမလား ကြိုမှန်းထားလို့မရတဲ့အနေအထားမျိုးမှာ အရေးပေါ်ထိခိုက်မိရင် သက်သာအောင်လုပ်ဖို့အတွက်ဆေးသေတ္တာရှိထားတာကမမှားတဲ့အရာတစ်ခုလို့ပဲအကြံပေးပါရစေ။

အရေးပေါ်ဆေးသေတ္တာဆိုတာဘာအတွက်ထားတာလဲ။ ။

အရေးပေါ်ဆေးသေတ္တာ ဆိုတာက မတော်တဆမှုတစ်ခုခုကြောင့်ထိခိုက်ဒဏ်ရာရရင်ဖြစ်ဖြစ်၊ရောဂါတစ်ခုခုကြောင့် အရေးပေါ်အခြေအနေဖြစ်ပေါ်နေတဲ့အခါ ခံစားနေရတဲ့အခြေအနေကနေသက်သာလာအောင် တစ်စုံတစ်ယောက်ကို ကူညီပြုစုပေးနိုင်ဖို့ အသင့်ဖြစ်နေအောင်ထားတာပါ။ ဒီလိုစောင့်ရှောက်မှုကို အရွယ်သုံးပါးစလုံးလိုအပ်ပါတယ်။ အရေးပေါ်ဆေးသေတ္တာ ရဲ့ရည်ရွယ်ချက်က လူတွေရဲ့ အသက်ကိုကယ်တင်ဖို့ နဲ့ အန္တရာယ်ဖြစ်နိုင်တဲ့ အခြေအနေကနေ ကူညီကယ်ဆယ်ပေးဖို့ပါ။

ဆေးသေတ္တာမှာ ဘာတွေပါရမလဲ။ ။

အရေးပေါ်ဆေးသေတ္တာမှာ ဘယ်ပစ္စည်းတွေကို ထည့်ထားသင့်သလဲဆိုတာလည်းအရေးကြီးပါတယ်။ ဒါမှ လိုအပ်တဲ့အချိန် ထိထိရောက်ရောက်အသုံးချနိုင်မှာဖြစ်ပါတယ်။ဆေးသေတ္တာမှာ ဒါတွေ ပါဝင်သင့်ပါတယ်။

• ပိုးသတ်ထားတဲ့ဂွမ်း
• စက္ကူတိပ်
• အနာကပ်ပလာစတာ
• ပတ်တီးလိပ်
• အရက်ပြန်
• ပိုးသတ်ဆေး
• အနာကျက်ဆေးအဆီ/ဆေးရည်
• ဇာဂနာ
• ကတ်ကြေးအသေး
• သာမိုမီတာ (ဒစ်ဂျစ်တယ်)
• တစ်ခါသုံးပလတ်စတစ်လက်အိတ်(အနည်းဆုံး နှစ်စုံ)
• ကိုယ်ပူကျဆေး နဲ့အကိုက်အခဲပျောက်ဆေး (ဥပမာ – Paracetamol၊ acetaminophen၊ aspirin ၊ibuprofen)
• ချောင်းဆိုးပျောက်ဆေး (အရည် သို့မဟုတ်သောက်ဆေး)
• အစာအိမ်နဲ့လေထိုးလေအောင့်အတွက် အစာအိမ်လေဆေး (ဥပမာ- Kremil S ၊Air X)
• ဓါတ်မတည့်မှုနဲ့ ယားယံခြင်းတို့အတွက်Antihistamine လိမ်းဆေး (ဥပမာ Cetrizine, Loratidine, Burmeton)
• ဒဏ်ကြေလိမ်းဆေး (ပရုတ်ဆီ၊ ရာပန်းဆီ၊ Vortex)

ဆေးသေတ္တာကို ပစ္စည်းတွေ ထည့်ပြီးပြီဆိုရင်

ကလေးတွေလက်လှမ်းမမီလောက်တဲ့၊ လူကြီးတွေယူရလွယ်လောက်တဲ့နေရာမှာ ထားပါ။ ဆေးသေတ္တာကို ပုံမှန်စစ်ကြည့်ပါ။ ကုန်နေတာရှိရင်ဖြည့်ပါ။ သက်တမ်းရက်လွန်နေတာရှိရင် အသစ်လဲထည့်ပါ။

အရေးပေါ်ဆေးသေတ္တာကို အသုံးပြုနိုင်မယ့်ရောဂါတွေကဘာတွေလဲ။ ။

• အပူလောင်နာ
• ပြတ်ရှဒဏ်ရာ
• ကုတ်ခြစ်ဒဏ်ရာ
• ပိုးကောင်ကိုက်တဲ့ဒဏ်ရာ
• အရေပြားပေါက်ပြဲဒဏ်ရာ
• ကြွက်သားတွေတောင့်တင်းနာကျင်တာ
• အသေးစားဖျားနာမှု
• နှာခေါင်းပိတ်တာ
• ချောင်းဆိုးတာ
• လည်ချောင်းနာတာ
• ညောင်းညာကိုက်ခဲတာ
• အစာမကြေတာ
• အရေပြားဓါတ်မတည့်တာ နဲ့
• အခြားအရေပြားပြဿနာတွေ အတွက်အသုံးပြုလို့ရပါတယ်။

အရေးပေါ်ဆေးသေတ္တာကို ဝယ်ထားဆောင်ထားရုံနဲ့လည်း မပြီးသေးပါဘူး။ ကိုယ်တိုင်အသုံးပြုတတ်အောင်လည်းလေ့လာသင်ယူ တာတွေလုပ်ရပါမယ်။ ကဲဒီလောက်ဆိုရင်တော့ ဆေးသေတ္တာကလေးရဲ့ အရေးပါပုံကို သိလောက်ပြီးလို့ထင်ပါတယ်။ ခုလို ပစ္စည်းတွေစုံစုံလင်လင်ထည့်ထားတဲ့ ဆေးသေတ္တာလေးတစ်ခု အိမ်မှာဆောင်ထားရင် မိသားစုရဲ့ ကျန်းမာရေးကို သင်က ဆရာဝန် မဟုတ်တောင် တစ်စိတ်တစ်ပိုင်းကနေ တာဝန်ယူနိုင်မှာပါ။ ။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။