အချိန်မတော် ဗိုက်ဆာတတ်သူတို့အတွက် ကျန်းမာရေးနှင့်ညီညွတ်သော သရေစာ ၁၄မျိုး

ညကြီးအချိန်မတော်ဗိုက်ဆာလာတာမျိုး လူတိုင်းကြုံဖူးကြမယ်ထင်ပါတယ်။ ညမအိပ်ခင်အချိန်တွေမှာ ရေခဲသေတ္တာဖွင့်ပြီး တွေ့ကရာမုန့်တွေစားတာထက် ကျန်းမာရေးနဲ့ညီညွတ်တဲ့ အစားအစာတွေ စားသုံးနိုင်ဖို့ကအရေးကြီးပါတယ်။

ညဘက်မှာတင် မကပဲ တစ်နေ့လုံးအတွက်သင့်တော်တဲ့ သရေစာ ၁၅မျိုးကတော့

၁ – ကွပ်ကီးခရပ်ကာမုန့်များ

ဂျုံမှာ အာဟာရဘယ်လောက်ပါသလဲဆိုတာကိုတော့ အားလုံးသိပြီးသားဖြစ်မယ်ထင်တယ်။ ဂျုံကွပ်ကီးခရပ်ကာတွေမှာ ကစီဓာတ်ရော အသားဓာတ်တွေပါ ပါဝင်တဲ့အတွက် သင့်ကိုအများကြီးမစားပဲ ဗိုက်ပြည့်စေမှာပါ။

၂ – အုတ်ဂျုံမုန့်

မနက်စောစော ဘိုစာ စားတတ်ကြသူတွေအတွက်တော့ အုတ်ဂျုံကို နွားနို့ဆမ်းစားတာနဲ့ စိမ်းမယ်မထင်ပါဘူး၊ အနောက်တိုင်းရုပ်ရှင်တွေမှာလည်း မနက်စာအနေနဲ့စားတတ်ကြတာ မကြာခဏတွေ့မြင်ရမှာပါ။ oatmeal လို့ခေါ်တဲ့ အုတ်ဂျုံကို မနက်စာအနေနဲ့ပဲမဟုတ်ဘဲ ညဘက်ဗိုက်ဆာလာတဲ့အခါလည်း စားလို့ရပါတယ်။

အုတ်ဂျုံမှာ ပါဝင်နေတဲ့ ကစီဓာတ်တွေက စားသုံးပြီးတဲ့အခါ သွေးထဲကိုစုပ်ယူပြီး သွေးတွင်းအချိုပမာဏကို ထိန်းညှိပေးပါတယ်။ မယ်လတိုနင်လို့ခေါ်တဲ့ အိပ်ပျော်ခြင်းကို အားပေးတဲ့ဓာတ်တစ်မျိုးကို ထွက်စေတဲ့အတွက်လည်း ကောင်းကောင်းမွန်မွန်အိပ်ပျော်စေဖို့ ကူညီပေးပါတယ်။

၃ – ပေါက်ပေါက်ဆုပ်

ပေါက်ပေါက်ဆုပ်က ဒီစာရင်းထဲပါဝင်လာမယ်လို့ သင်ထားမှာမဟုတ်ပါဘူး ဒါပေမဲ့တကယ် ပါဝင်လာပါတယ်။ အသီးအနှံတွေ စားရမှာပျင်းတယ် သရေစာလိုအရာမျိုးပဲစားချင်တယ် ကျန်းမာရေးနဲ့လည်းအထိုက်အလျောက် ညီညွှတ်ချင်တယ်ဆိုရင်တော့ ပေါက်ပေါက်ဆုပ်က ရွေးချယ်ချင်စရာပါပဲ။

အချိုတွေအပိုထပ် topping ထည့်ထားတာမျိုးမပါဝင်တဲ့ ပေါက်ပေါက်ဆုပ်တွေမှာဆိုရင် ကယ်လိုရီပါဝင်မှု နည်းပါးပါတယ်။ ဒါကြောင့် ဆီ သို့မဟုတ် ထောပတ် မရောထားတဲ့ ပေါက်ပေါက်တွေကို ဝိတ်တက်မှာစိုးရိမ်စရာမလိုပဲ စိတ်ချလက်ချစားနိုင်ပါပြီ။

၄ – ဒိန်ချဉ်

ဒိန်ချဉ်တွေမှာ ကယ်လိုရီပါဝင်မှုနည်းပြီး ပရိုတိန်းလို့ခေါ်တဲ့ အသားဓာတ်တွေလည်း ကြွယ်ဝစွာပါဝင်ပါတယ်။ ဒိန်ချဉ်ထဲမှာပါတဲ့ ကယ်လ်ဆီယမ်ဓာတ်က ဦးနှောက်ကို ကောင်းသောသက်ရောက်ခြင်းတွေဖြစ်ပေါ်စေပြီး ညဘက်ကိုကောင်းစွာအိပ်စက်စေနိုင်ပါတယ်။

ဒိန်ချဉ်ကြီးသက်သက် မစားချင်ရင်လည်း အချိုတွေဖြည့်မယ့်အစား စတော်ဘယ်ရီလို အသီးအနှံလေးတွေ အပေါ်ကဖြူးပြီး အလှဆင်စားမယ်ဆိုရင် အရသာလည်းပိုရှိ ကျန်းမာရေးနဲ့လည်းပိုညီညွှတ်မှာပါ။

၅ – မြေပဲယိုသုပ်ပေါင်မုန့်

ငယ်ငယ်ထဲက သင်အရမ်းကြိုက်ခဲ့တဲ့ သရေစာလေးက ကျန်းမာရေးနဲ့သင့်တော်တဲ့ ညလယ်စာဖြစ်နေမယ်လို့ ဘယ်သူထင်မှာလဲ။ မြေပဲယိုတွေမှာ tryptophan လို့ခေါ်တဲ့အိပ်စက်ခြင်းကို အားပေးတဲ့အရာတွေပါဝင်ပါတယ်။ ပေါင်မုန့်က ကစီဓာတ်တွေကလည်း ဦးနှောက်ကို tryptophan တွေကိုပိုပြီးအသုံးချနိုင်အောင် အားပေးပါတယ်။

၆ – ဖရုံစေ့

မက်ဂနီဆီယမ်နဲ့ အမိုင်နိုအက်စစ်တွေပြည့်ဝစွာပါဝင်တဲ့ ဖရုံစေ့တွေကလည်း ညမအိပ်ခင်စားဖို့သင့်တော်တဲ့ အစားအစာတွေထဲမှာပါဝင်ပါတယ်။

၇ – ငှက်ပျော်သီး

ငယ်ငယ်က ငှက်ပျော်သီးစားတာ အရမ်းကောင်းတယ်လို့ လူကြီးတွေပြောတာ၊ ကျောင်းက အားကစားဆရာကလည်း အားကစားပွဲတွေမစခင် ငှက်ပျော်သီးစားဖို့ ပြောတာ ကြားဖူးတယ်မလား။ ဘာကြောင့်လဲဆိုတော့ ငှက်ပျော်သီးထဲမှာ ပိုတက်ဆီယမ်ဓာတ်တွေကြွယ်ဝစွာပါဝင်နေလို့ပါ။

ငှက်ပျော်သီးကို ညဘက်ဗိုက်ဆာတဲ့ အခါစားသုံးပေးခြင်းအားဖြင့် အရသာရှိရုံတင်မဟုတ်ဘဲ အလွယ်တကူဗိုက်တင်းစေနိုင်ပါတယ်။

၈ – အခွံမာသီး

အခွံမာသီးအများစုမှာ ပရိုတိန်းဓာတ်နဲ့ ကျန်းမာရေးနဲ့ညီညွတ်တဲ့အဆီတွေ ပြညပြည့်ဝဝပါဝင်နေတဲ့အတွက် ညဘက်ကိုအစားတစ်လုပ်အတွက်ပြင်ဆင်ရမှာ ပျင်းတဲ့သူတွေအတွက်တော့အကောင်းဆုံးရွေးချယ်မှုပါပဲ။

၉ – မက်မွန်သီး

မက်မွန်သီးတွေမှာ တစ်နေ့တာတွက်လိုအပ်တဲ့ မက်ဂနီဆီယမ်၊ ပိုတက်ဆီယမ်နဲ့ tryptophan လို့ခေါ်တဲ့ဓာတ်တွေကြွယ်ဝစွာပါဝင်ပါတယ်။

၁၀ – ကြက်ဆင်သား sandwich

ကြက်ဆင်သားက ဒီမှာတော့နည်းနည်းရှားမယ်ထင်ပါတယ်။ ဒါပေမဲ့ ကြက်ဆင်သားမှာ အိပ်စက်ခြင်းကို အားပေးတဲ့အရာတွေ အများကြီးပါတဲ့အတွက် ကောင်းမွန်စွာအိပ်ပျော်စေနိုင်ပါတယ်။ Sandwich ထဲကိုတော့ အဆီများတာတွေ ထည့်မယ်အစား ကြက်သွန်၊ ဆလတ်ရွက်လိုအသီးအရွက်တွေ ထည့်စားမယ်ဆိုရင် အကောင်းဆုံးပါပဲ။

၁၁ – ပဲတောင့်ရှည်

ပဲတောင့်ရှည်ထဲမှာ အသားဓာတ်တွေအပြင် အမျှင်ဓာတ်တွေကလည်း ပေါပေါများများပါဝင်ပါတယ်။ ညဘက်ကောင်းကောင်းအိပ်စေတဲ့အပြင် အလွယ်တကူလည်းစားရအဆင်ပြေတဲ့ ရွေးချယ်စရာတစ်ခုပါ။

၁၂ – ဥအမျိုးမျိုး

ဒီနားလောက် ရောက်နေပြီဆိုရင်တော့ ဥတွေပါလာတော့မယ်ဆိုတာ ရိပ်မိလောက်ပြီထင်ပါတယ်။ ဟုတ်ပါတယ် ကြက်ဥ၊ ဘဲဥ တွေမှာ အသားဓာတ်အပါအဝင် ခနွာကိုယ်အတွက်လိုအပ်တဲ့ ဗီတာမင်ဓာတ်တွေလည်း ပြည့်ပြည့်စုံစုံပါဝင်ပါတယ်။

ဒါ့အပြင် သင့်အိမ်က ရေခဲသေတ္တထဲမှာ အမြဲတမ်းအသင့်ရနိုင်တဲ့ အဆာပြေစားစရာတစ်ခုလည်း ဖြစ်တယ်မလား။

၁၃ – ချိစ်ဘီစကစ်

ညကောင်းကောင်းအိပ်ပျော်စေနိုင်တဲ့ အစားအစာတွေထဲမှာ ချိစ်က နံပတ် ၁ ပါပဲ။ ဘီစကစ် ဒါမှမဟုတ် cracker လေးပေါ်မှာ ချိစ်လေးသုပ်ပြီးစားလိုက်မယ်ဆိုရင် ပြီးပြည့်စုံတဲ့ အစာပြေညစာလေးဖြစ်လာမှာပါ။

၁၄ – ထောပတ်သီး

ထောပတ်သီးကို ဘုရားသခင်ရဲ့ထောပတ်လို့ တစ်ချို့ကတင်စားကြပါတယ်။ အစာချေစနစ်အတွက်လိုအပ်တဲ့ ပိုတက်ဆီယမ်၊ အမျှင်ဓာတ်တွေနဲ့ ကျန်းမာရေးနဲ့ညီညွတ်တဲ့အဆီတွေ အချိုးကျကျပါဝင်နေတဲ့အတွက် ဖျော်ရည်အနေနဲ့ဖြစ်ဖြစ်၊ ပေါင်မုန့်နဲ့သုတ်စားတာဖြစ်ဖြစ်မျိုးစုံလုပ်စားလို့ သင့်တော်ပါတယ်။

ရေးသားသူ မောင်မျိုးအောင် ( ဆေး-၁ )

Hello Health Group သည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။