အိပ်နေရင်း စကားပြောတာရောဂါလား

ညအိပ်နေရင်း စကားပြောတတ်သူလား။ ဒါကဖြေရခက်တယ်နော်။ သူများတွေညအိပ်ရင်း စကားပြောတာကို သိနိုင်ပေမယ့် ကိုယ်တိုင်ကျ ညအိပ်ရင်းစကားပြောတတ်လားဆိုတာကိုကျ သိနိုင်ဖို့ခက်ပါတယ်။ ဒီပြဿနာကိုအဖြေရှာပေးနိုင်မှာက ကိုယ့်ရဲ့ မိသားစုဝင်တွေပါ။ ကိုယ်တိုင်က အိပ်နေရင်း စကားပြောတတ်သူလားဆိုတာကို သိနိုင်ဖို့အတွက် မိသားစုဝင်တွေကိုမေးကြည့်ပါ။

အိပ်နေရင်းစကားပြောခြင်း

အိပ်နေရင်းစကားပြောခြင်းကိုဆေးပညာအခေါ်အဝေါ်အနေနဲ့somniloquy လို့ခေါ်ကြပါတယ်။ အိပ်ပျော်နေစဉ်မှာ စကားပြောတတ်တဲ့ ပုံမှန်မဟုတ်တဲ့အလေ့အထတစ်မျိုးပါ။ လူတိုင်းတော့ မဖြစ်နိုင်ပါဘူး။ အိပ်နေတုန်းစကားပြောတတ်တဲ့အကျင့်ရှိသူတွေက သူတို့ဆီမှာ ဒီအကျင့်ရှိနေမှန်းတောင် မသိကြပါဘူး။ အိပ်နေစဉ်စကားပြောတဲ့အခါ ပုံမှန်ပြောနေကျအသံနဲ့ မတူတတ်ပါဘူး။ မသိစိတ်ရဲ့စေခိုင်းမှုအတိုင်းလုပ်မိနေတဲ့အပြုအမူတစ်ခုပေါ့။ အိပ်နေစဉ်စကားပြောတာက REM အဆင့်မှာဖြစ်တာများပြီး non-REM (NREM) အဆင့်မှာ မဖြစ်တတ်ကြပါဘူး။ REM အဆင့်မှာ အိပ်မက်မက်နေရင်း အိပ်မက်ထဲကမှာမြင်မက်နေတဲ့ အကြောင်းအရာတွေအပေါ် တုံ့ပြန်တဲ့အနေနဲ့ နှုတ်ကနေအသံထွက်တာကြောင့် အိပ်နေစဉ်စကားပြောခြင်းဖြစ်စဉ်ဖြစ်လာရတာပါ။ အသံက သဲသဲကွဲကွဲတော့ သိပ်မဖြစ်တတ်ပါဘူး။

အိပ်နေစဉ်စကားပြောခြင်းက ကလေးငယ်တွေမှာအဖြစ်များပါတယ်။ အသက် ၃ နှစ် ကနေ ၁၀ နှစ်အတွင်းကျောင်းနေအရွယ်ကလေးတွေမှာအဖြစ်များတယ်လို့ စစ်တမ်းတွေအရသိရပါတယ်။ ဒီအရွယ်ကလေးငယ်တွေထဲထက်ဝက်ခန့်က ညအိပ်နေစဉ်မှာ စကားပြောကြပါတယ်။ ဒီလိုပြောတဲ့အခါမှာလည်း လက်ရှိကြုံတွေ့နေရတဲ့အကြောင်းအရာတွေနဲ့ အရင်က ကြုံခဲ့ဖူးတဲ့ အကြောင်းအရာတွေကိုပြောကြတာပိုများပါတယ်။

ဒါတွေကြောင့် အိပ်နေရင်းစကားပြောတာပါ

တော်တော်များများယူဆထားတာက အိပ်နေတုန်းစကားပြောတာက အိပ်မက်ရဲ့ တစ်စိတ်တစ်ပိုင်းလို့ပေါ့။ တကယ်တော့ မဟုတ်ပါဘူး။ ဒီအချက်တွေကြောင့် အိပ်နေရင်းစကားပြောရတာပါ။

ပြင်ပကအကြောင်းအရာတွေ – စိတ်ဖိစီးမှုများနေတာ၊ စိတ်ဓာတ်ကျနေတာ၊ အဖျားတက်နေတာ၊ အိပ်ရေးပျက်တာတွေကြောင့်ပါ။

မျိုးဗီဇ – မျိုးရိုးလိုက်တာကြောင့်လည်း အိပ်နေစဉ်စကားပြောကြတာပါ။ ကလေးဘဝမှာ မိဘတစ်ဦးဦးက အိပ်နေစဉ်စကားပြောတာကိုမြင်ခဲ့ဖူးတဲ့ ကလေးတွေက အိပ်နေတုန်းမှာ စကားပြောတတ်ကြပါတယ်။

အိပ်စက်မှုပြဿနာရှိတာ – အိပ်စက်မှုပြဿနာရှိသူတွေ၊ ညဘက်အိပ်ရေးပျက်သူတွေ၊ အိပ်မက်ဆိုးမကြာခဏမက်တတ်သူတွေမှာလည်း အိပ်နေစဉ်စကားပြောတတ်ကြပါတယ်။

စိတ်ရောဂါရှိနေတာ – စိတ်ပိုင်းဆိုင်ရာဝေဒနာတစ်ခုခုကို ခံစားနေရသူတွေကလည်း ညအိပ်နေစဉ်မှာ စကားပြောတတ်ကြပါတယ်။

သောက်သုံးနေရတဲ့ဆေးဝါးတွေကြောင့် – အချို့သော ဆေးဝါးတွေ အိပ်နေစဉ်စကားပြောတာကိုဖြစ်စေနိုင်ပါတယ်။ ဥပမာပြောပြရရင် ပန်းနာရင်ကျပ်ရောဂါ သက်သာစေဖို့သောက်သုံးရတဲ့ဆေးတွေက ညအိပ်နေစဉ် စကားပြောတာမျိုးကိုဖြစ်စေနိုင်ပါတယ်။

အိပ်နေစဉ်စကားပြောတာရောဂါလား………………

အိပ်နေစဉ်စကားပြောတာကရောဂါမဟုတ်ပါဘူး။ အိပ်နေစဉ်မှာဖြစ်တတ်တဲ့ အခြေအနေတစ်မျိုးပါ။ အိပ်နေစဉ်စကားပြောတာက အိပ်စက်မှုကို ထိခိုက်တာမျိုးမရှိသလို ကျန်းမာရေးကို ထိခိုက်စေတာမျိုးလည်းမရှိနိုင်ပါဘူး။ ဒါကဖြစ်လေ့ဖြစ်ထရှိတယ်ဆိုပေမယ့် ညတိုင်းဖြစ်နေမယ်ဆိုရင်တော့ မိသားစုဝင်တွေကို အိပ်ရေးပျက်စေနိုင်ပါတယ်။ ဒီလိုမျိုးဖြစ်လာပြီဆိုရင်တော့ သင့်တော်တဲ့ ကုထုံးကို ခံယူဖို့ အကြံပြုပါရစေ။